مکمل شاعری
ہر عقدۂ تقدیر جہاں کھول رہی ہے
ہاں دھیان سے سننا یہ صدی بول رہی ہے
انگڑائیاں لیتی ہے تمنا تری دل میں
شیشے میں پری ناز کے پر تول رہی ہے
رہ رہ کے کھنک جاتی ہے ساقی یہ شب ماہ
اک جام پلا خنکئ شب بول رہی ہے
دل تنگ ہے شب کو کفن نور پنہا کے
وہ صبح جو غنچوں کی گرہ کھول رہی ہے
ہر آن وہ رگ رگ میں چٹکتی ہوئی کلیاں
اس شوخ کی اک ایک ادا بول رہی ہے
شبنم کی دمک ہے کہ شب ماہ کی دیوی
موتی سر گلزار جہاں رول رہی ہے
پہلو میں شب تار کے ہے کون سی دنیا
جس کے لئے آغوش سحر کھول رہی ہے
رکھتی ہے مشیت حد پرواز جہاں بھی
انسان کی ہمت وہیں پر تول رہی ہے
— فراق گورکھپوری