مکمل شاعری

سنا تو ہے کہ کبھی بے نیاز غم تھی حیات

دلائی یاد نگاہوں نے تیری کب کی بات

زماں مکاں ہے فقط مد و جزر جوش حیات

بس ایک موج کی ہیں جھلکیاں قرار و ثبات

حیات بن گئی تھی جن میں ایک خواب حیات

ارے دوام و ابد تھے وہی تو کچھ لمحات

حیات دوزخیاں بھی تمام مبہم ہے

عذاب بھی نہ میسر ہوا کہاں کی نجات

بس ایک راز تسلسل بس اک تسلسل راز

کہاں پہنچ کے ہوئی ختم بحث ذات و صفات

سکوت راز وہی ہے جو داستاں بن جائے

نگاہ ناز وہی جو نکالے بات میں بات

بس اک شراب کہن کے کرشمے ہیں ساقی

نئے زمانے نئی مستیاں نئی برسات

تمام خستگی و ماندگی ہے عالم ہجر

تھکے تھکے سے یہ تارے تھکی تھکی سی یہ رات

تری غزل تو نئی روح پھونک دیتی ہے

فراقؔ دیر سے چھوٹی ہوئی ہے نبض حیات

جسے سب اہل جہاں زندگی سمجھتے ہیں

کبھی کبھی تو ملے ایسی زندگی سے نجات

کسی پہ ظلم برا ہے مگر یہ کہتا ہوں

کہ آدمی پہ ہو احسان آدمی ہیہات

اگر خدا بھی ملے تو نہ لے کہ او ناداں

ہے تو ہی کعبۂ دیں تو ہی قبلۂ حاجات

چمکتے درد کھلے چہرے مسکراتے اشک

سجائی جائے گی اب طرز نو سے بزم حیات

تمام عکس ہے دنیا تمام عکس عدم

کہاں تک آئنہ در آئنہ حیات و ممات

فضا میں مہکی ہوئی چاندنی کہ نغمۂ راز

کہ اتریں سینۂ شاعر میں جس طرح نغمات

غم و نشاط محبت کی چھوڑ دے لالچ

ہر اک سے اٹھتے نہیں یہ عذاب یہ برکات

تری نگاہ کی صبحیں نگاہ کی شامیں

حریم راز یہ دنیا جہاں نہ دن ہیں نہ رات

— فراق گورکھپوری