مکمل شاعری

حریم عشق کے پردوں سے لو نکلتی ہے

یہ سوز و ساز ہے کس نغمۂ رباب کی آنچ

دلوں کا سوز ترے روئے بے نقاب کی آنچ

تمام گرمئ محفل ترے شباب کی آنچ

ثواب خلد بریں کیا عذاب دوزخ کیا

ترے خطاب کی ٹھنڈک ترے عتاب کی آنچ

یہ کیف حسن یہ برق نگاہ کیا کہنا

لگا دے آگ نہ اس دامن سحاب کی آنچ

لہکتے سبزے میں ابر بہار کی مستی

دہکتے پھول میں چھلکی ہوئی شراب کی آنچ

چڑھا کے ساغر مے جگمگا اٹھے چہرے

سمٹ کے آ گئی سینوں میں آفتاب کی آنچ

پناہ مانگ رہی ہے ہری بھری دنیا

نہ پوچھ آہ دل خانماں خراب کی آنچ

سحر کی تازہ دمی چڑھتی دھوپ کی گرمی

تری نگاہ کی ٹھنڈک ترے شباب کی آنچ

یہ اگلے وقتوں کے ہیں خوش ہیں باغ جنت میں

انہیں خبر ہی نہیں کیا ہے اس ثواب کی آنچ

جسے سمجھتے ہیں سب موج کوثر و تسنیم

وہ آئنہ بھی ہے تپتے ہوئے سراب کی آنچ

رکی رکی سی لب شوق پر ہے عرض وصال

کہ پھونک دے نہ ترے ذوق انتخاب کی آنچ

یہ آ گیا ہے یہاں کون کافر معصوم

کہ ٹھنڈی پڑ گئی دوزخ کے بھی عذاب کی آنچ

یہ رات آگ لگا دے کہیں نہ دنیا میں

یہ چاندنی یہ ہوائیں یہ ماہتاب کی آنچ

سمیٹ رکھے ہیں روح القدس نے پر اپنے

پہنچ رہی ہے کہاں تک اس اضطراب کی آنچ

یہی ہے رونق گرمی یہی ہے رونق بزم

نگاہ ناز ترے ذوق انتخاب کی آنچ

سوار ابلق ایام موسم گل ہے

چمن کے شعلے ہیں یا حلقۂ رکاب کی آنچ

شعاعیں پھوٹ کے جیسے فضا میں گم ہو جائیں

چھلکتے جام میں یہ چشمک حباب کی آنچ

یہ مہر و ماہ بھی اڑتے ہوئے شرارے ہیں

کہ عرش تک ہے محبت کے پیچ و تاب کی آنچ

فراقؔ وقت کے رخ سے الٹ رہی ہے نقاب

زمیں سے تا بہ فلک ہے اس انقلاب کی آنچ

— فراق گورکھپوری