مکمل شاعری

یہ سرمئی فضاؤں کی کنمناہٹیں

ملتی ہیں مجھ کو پچھلے پہر تیری آہٹیں

جھونکوں کی نذر ہے چمن انتظار دوست

یاد امید و بیم کی یہ سنسناہٹیں

پڑتی ہے آسمان محبت پہ چھوٹ سی

بل بے جبین ناز تری جگمگاہٹیں

ہو سامنا اگر تو خجل ہو نگاہ برق

دیکھی ہیں عضو عضو میں وہ اچپلاہٹیں

کس دیس کو سدھار گئیں اے جمال یار

رنگیں لبوں پہ کھیل کے کچھ مسکراہٹیں

اے جسم‌ نازنین نگار نظر نواز

صبح شب وصال تیری ملگجاہٹیں

چلتی ہے جب نسیم خیال خرام ناز

سنتا ہوں دامنوں کی ترے سرسراہٹیں

چشم سیہ تبسم پنہاں لئے ہوئے

پو پھوٹنے سے قبل افق کی اداہٹیں

آزردگی حسن بھی کس درجہ شوخ ہے

اشکوں میں تیرتی ہوئی کچھ مسکراہٹیں

ہونے لگا ہوں خود سے قریں اے شب الم

میں پا رہا ہوں ہجر میں کچھ اپنی آہٹیں

میری غزل کی جان سمجھنا انہیں فراقؔ

شمع خیال یار کی یہ تھرتھراہٹیں

جنبش میں جیسے شاخ ہو گلہائے‌ نغمہ کی

اک پیکر جمیل کی یہ لہلہاہٹیں

اس کائنات غم کی فسردہ فضاؤں میں

بکھرا گئے ہیں آ کے وہ کچھ مسکراہٹیں

ساز جمال کی یہ نواہائے سرمدی

جوبن تو وہ فرشتے سنیں گنگناہٹیں

رخسار تر سے تازہ ہو باغ عدن کی یاد

اور اس کی پہلی صبح کی وہ رسمساہٹیں

— فراق گورکھپوری