مکمل شاعری
اشعار نہیں ہیں یہ مری روح کی ہے پیاس
جاری ہوئے سرچشمے مری تشنہ لبی سے
کہتا ہوں اسے میں تو خصوصیت پنہاں
کچھ تم کو شکایت ہے کسی سے تو مجھی سے
اک روز ہوئے تھے کچھ اشارات خفی سے
عاشق ہیں ہم اس نرگس رعنا کے جبھی سے
کرنے کو ہیں دور آج تو تو یہ روگ ہی جی سے
اب رکھیں گے ہم پیار نہ تم سے نہ کسی سے
احباب سے رکھتا ہوں کچھ امید شرافت
رہتے ہیں خفا مجھ سے بہت لوگ اسی سے
یاد لب جاناں ہے چراغ دل رنجور
روشن ہے یہ گھر آج اسی لعل یمنی سے
کچھ زیر لب الفاظ کھنکتے ہیں فضا میں
گونجی ہوئی ہے بزم تری کم سخنی سے
آنسو کو مرے کھیل تماشا نہ سمجھنا
کٹ جاتا ہے پتھر اسی ہیرے کی کنی سے
آج انجمن عشق نہیں انجمن عشق
کس درجہ کمی بزم میں ہے تیری کمی سے
افلاک کی محراب ہے آئی ہوئی انگڑائی
بے کیف کچھ آفاق کی اعضا شکنی سے
خود مجھ کو بھی تا دیر خبر ہو نہیں پائی
آج آئی تری یاد اس آہستہ روی سے
اس وادئ ویراں میں ہے سر چشمۂ دل بھی
ہستی مری سیراب ہے آنکھوں کی نمی سے
سب کچھ وہ دلا دے مجھے سب کچھ وہ بنا دے
اے دوست نہیں دور تری کم نگہی سے
اک دل کے سوا پاس ہمارے نہیں کچھ بھی
جو کام ہو لے لیتے ہیں ہم لوگ اسی سے
اس سے تو کہیں بیٹھ رہے توڑ کے اب پاؤں
مل جائے نجات عشق کو اس در بدری سے
معلوم ہوا اور ہے اک عالم اسرار
آئینۂ ہستی کی پریشاں نظری سے
رہتا ہوں فراقؔ اس لئے وارفتہ کہ دنیا
کچھ ہوش میں آ جائے مری بے خبری سے
میعاد دوام و ابد اک نیند ہے اس کی
ہم منتہیٔ جلوۂ جاناں ہیں ابھی سے
وہ ڈھونڈھنے نکلی ہے تری نکہت گیسو
اک روز ملا تھا میں نسیم سحری سے