مکمل شاعری

کچھ اور بھی تو ہو ان اشارات کے سوا

یہ سب تو اے نگاہ کرم بات بات بات

اک عمر کٹ گئی ہے ترے انتظار میں

ایسے بھی ہیں کہ کٹ نہ سکی جن سے ایک رات

مایوسیوں کی گود میں دم توڑتا ہے عشق

اب بھی کوئی بنا لے تو بگڑی نہیں ہے بات

ہم اہل انتظار کے آہٹ پہ کان تھے

ٹھنڈی ہوا تھی غم تھا ترا ڈھل چلی تھی رات

یوں تو بچی بچی سی اٹھی وہ نگاہ ناز

دنیائے دل میں ہو ہی گئی کوئی واردات

جن کا سراغ پا نہ سکی غم کی روح بھی

ناداں ہوئے ہیں عشق میں ایسے بھی سانحات

اس جا تری نگاہ مجھے لے گئی جہاں

لیتی ہو جیسے سانس یہ بے جان کائنات

یہ نکہتوں کی نرم روی یہ ہوا یہ رات

یاد آ رہے ہیں عشق کو ٹوٹے تعلقات

ہم اہل غم نے رنگ زمانہ بدل دیا

کوشش تو کی سبھی نے مگر بن پڑے کی بات

شاعر ہوں گہری نیند میں ہیں جو حقیقتیں

چونکا رہے ہیں ان کو بھی میرے توہمات

کیا نیند آئے اس کو جسے جاگنا نہ آئے

جو دن کو دن کرے وہ کرے رات کو بھی رات

دریا کے مد و جزر بھی پانی کے کھیل ہیں

ہستی ہی کے کرشمے ہیں کیا موت کیا حیات

اہل رضا میں شان بغاوت بھی ہو ذرا

اتنی بھی زندگی نہ ہو پابند رسمیات

ہر سعی و ہر عمل میں محبت کا ہاتھ ہے

تعمیر زندگی کے سمجھ کچھ محرکات

پیدا کرے زمین نئی آسماں نیا

اتنا تو لے کوئی اثر دور کائنات

مجھ کو تو غم نے فرصت غم بھی نہ دی فراقؔ

دے فرصت حیات نہ جیسے غم حیات

— فراق گورکھپوری