مکمل شاعری

نئی منزل کے میر کارواں بھی اور ہوتے ہیں

پرانے خضر رہ بدلے وہ طرز رہبری بدلا

بدلتے جا رہے ہیں ہم بھی دنیا کو بدلنے میں

نہیں بدلی ابھی دنیا تو دنیا کو ابھی بدلا

خدا و اہرمن بدلے وہ ایمان دوئی بدلا

حدود خیر و شر بدلے مذاق کافری بدلا

بتائے تو بتائے اس کو تیری شوخئ پنہاں

تری چشم توجہ ہے کہ طرز بے رخی بدلا

نئے انسان کا جب دور خود نا آگہی بدلا

رموز بے خودی بدلے تقاضائے‌ خودی بدلا

بہ فیض آدم خاکی زمیں سونا اگلتی ہے

اسی ذرے نے دور مہر و ماہ و مشتری بدلا

فراقؔ ہمنوائے‌‌ میرؔ و غالبؔ اب نئے نغمے

وہ بزم زندگی بدلی وہ رنگ شاعری بدلا

زہے سوز‌ غم آدم خوشا ساز دل آدم

اسی اک شمع کی لو نے جہان تیرگی بدلا

ستارے جاگتے ہیں رات لٹ چھٹکائے سوتی ہے

دبے پاؤں کسی نے آ کے خواب زندگی بدلا

کبھی سوچا بھی ہے اے نظم کہنہ کے خداوندو

تمہارا حشر کیا ہوگا جو یہ عالم کبھی بدلا

ادھر پچھلے سے اہل‌‌ مال و زر پر رات بھاری ہے

ادھر بیداری جمہور کا انداز بھی بدلا

نئے منصور ہیں صدیوں پرانے شیخ و قاضی ہیں

نہ فتوے کفر کے بدلے نہ عذر دار ہی بدلا

زمیں بدلی فلک بدلا مذاق زندگی بدلا

تمدن کے قدیم اقدار بدلے آدمی بدلا

— فراق گورکھپوری