مکمل شاعری

فرقت ہو یا وصال وہی اضطراب ہے

تیرا اثر ہے اے غم فرقت کہاں کہاں

آئی ہے کچھ نہ پوچھ قیامت کہاں کہاں

اف لے گئی ہے مجھ کو محبت کہاں کہاں

اے نرگس سیاہ بتا دے ترے نثار

کس کس کو ہے یہ ہوش یہ غفلت کہاں کہاں

بیتابی و سکوں کی ہوئیں منزلیں تمام

بہلائیں تجھ سے چھٹ کے طبیعت کہاں کہاں

ہر جنبش نگاہ میں صد کیف بے خودی

بھرتی پھرے گی حسن کی نیت کہاں کہاں

راہ طلب میں چھوڑ دیا دل کا ساتھ بھی

پھرتے لیے ہوئے یہ مصیبت کہاں کہاں

دل کے افق تک اب تو ہیں پرچھائیاں تری

لے جائے اب تو دیکھ یہ وحشت کہاں کہاں

بے گانگی پر اس کی زمانے سے احتراز

در پردہ اس ادا کی شکایت کہاں کہاں

نیرنگ عشق کی ہے کوئی انتہا کہ یہ

یہ غم کہاں کہاں یہ مسرت کہاں کہاں

فرق آ گیا تھا دور حیات و ممات میں

آئی ہے آج یاد وہ صورت کہاں کہاں

ہر گام پر طریق محبت میں موت تھی

اس راہ میں کھلے در رحمت کہاں کہاں

جیسے فنا بقا میں بھی کوئی کمی سی ہو

مجھ کو پڑی ہے تیری ضرورت کہاں کہاں

اب امتیاز عشق و ہوس بھی نہیں رہا

ہوتی ہے تیری چشم عنایت کہاں کہاں

دنیا سے اے دل اتنی طبیعت بھری نہ تھی

تیرے لئے اٹھائی ندامت کہاں کہاں

ہوش و جنوں بھی اب تو بس اک بات ہیں فراقؔ

ہوتی ہے اس نظر کی شرارت کہاں کہاں

— فراق گورکھپوری