مکمل شاعری

حسرت دید میں گزراں ہیں زمانے کب سے

دشت امید میں گرداں ہیں دوانے کب سے

دیر سے آنکھ پہ اترا نہیں اشکوں کا عذاب

اپنے ذمے ہے ترا قرض نہ جانے کب سے

سر کرو ساز کہ چھیڑیں کوئی دل سوز غزل

ڈھونڈتا ہے دل شوریدہ بہانے کب سے

کس طرح پاک ہو بے آرزو لمحوں کا حساب

درد آیا نہیں دربار سجانے کب سے

پر کرو جام کہ شاید ہو اسی لحظہ رواں

روک رکھا ہے جو اک تیر قضا نے کب سے

فیضؔ پھر کب کسی مقتل میں کریں گے آباد

لب پہ ویراں ہیں شہیدوں کے فسانے کب سے

— فیض احمد فیض