مکمل شاعری

رہ خزاں میں تلاش بہار کرتے رہے

شب سیہ سے طلب حسن یار کرتے رہے

وہ دن کہ کوئی بھی جب وجہ انتظار نہ تھی

ہم ان میں تیرا سوا انتظار کرتے رہے

خیال یار کبھی ذکر یار کرتے رہے

اسی متاع پہ ہم روزگار کرتے رہے

نہیں شکایت ہجراں کہ اس وسیلے سے

ہم ان سے رشتۂ دل استوار کرتے رہے

ضیائے بزم جہاں بار بار ماند ہوئی

حدیث شعلہ رخاں بار بار کرتے رہے

انہیں کے فیض سے بازار عقل روشن ہے

جو گاہ گاہ جنوں اختیار کرتے رہے

ہم اپنے راز پہ نازاں تھے شرمسار نہ تھے

ہر ایک سے سخن راز دار کرتے رہے

— فیض احمد فیض