مکمل شاعری

ہے وہی عارض لیلیٰ وہی شیریں کا دہن

نگہ شوق گھڑی بھر کو جہاں ٹھہری ہے

ہے خبر گرم کہ پھرتا ہے گریزاں ناصح

گفتگو آج سر کوئے بتاں ٹھہری ہے

آج تک شیخ کے اکرام میں جو شے تھی حرام

اب وہی دشمن دیں راحت جاں ٹھہری ہے

وصل کی شب تھی تو کس درجہ سبک گزری تھی

ہجر کی شب ہے تو کیا سخت گراں ٹھہری ہے

دست صیاد بھی عاجز ہے کف گلچیں بھی

بوئے گل ٹھہری نہ بلبل کی زباں ٹھہری ہے

آتے آتے یوں ہی دم بھر کو رکی ہوگی بہار

جاتے جاتے یوں ہی پل بھر کو خزاں ٹھہری ہے

بکھری اک بار تو ہاتھ آئی ہے کب موج شمیم

دل سے نکلی ہے تو کب لب پہ فغاں ٹھہری ہے

ہم نے جو طرز فغاں کی ہے قفس میں ایجاد

فیضؔ گلشن میں وہی طرز بیاں ٹھہری ہے

اب وہی حرف جنوں سب کی زباں ٹھہری ہے

جو بھی چل نکلی ہے وہ بات کہاں ٹھہری ہے

— فیض احمد فیض