مکمل شاعری

دولت لب سے پھر اے خسرو شیریں دہناں

آج ارزاں ہو کوئی حرف شناسائی کا

چاند نکلے کسی جانب تری زیبائی کا

رنگ بدلے کسی صورت شب تنہائی کا

ایک بار اور مسیحائے دل دل زدگاں

کوئی وعدہ کوئی اقرار مسیحائی کا

صحن گلشن میں کبھی اے شہ شمشاد قداں

پھر نظر آئے سلیقہ تری رعنائی کا

گرمئی رشک سے ہر انجمن گل بدناں

تذکرہ چھیڑے تری پیرہن آرائی کا

دیدہ و دل کو سنبھالو کہ سر شام فراق

ساز و سامان بہم پہنچا ہے رسوائی کا

— فیض احمد فیض