مکمل شاعری

جب تجھے یاد کر لیا صبح مہک مہک اٹھی

جب ترا غم جگا لیا رات مچل مچل گئی

شام فراق اب نہ پوچھ آئی اور آ کے ٹل گئی

دل تھا کہ پھر بہل گیا جاں تھی کہ پھر سنبھل گئی

دل سے تو ہر معاملہ کر کے چلے تھے صاف ہم

کہنے میں ان کے سامنے بات بدل بدل گئی

بزم خیال میں ترے حسن کی شمع جل گئی

درد کا چاند بجھ گیا ہجر کی رات ڈھل گئی

آخر شب کے ہم سفر فیضؔ نہ جانے کیا ہوئے

رہ گئی کس جگہ صبا صبح کدھر نکل گئی

— فیض احمد فیض