مکمل شاعری
سرکشی وجہ افتخار نہیں
قد میں شمشاد سے بڑا ہے تاڑ
ستیاناس ہو گیا دل کا
عشق نے خوب کی اکھاڑ پچھاڑ
عشق کے واسطے ہے دل کی آڑ
کوئی دیکھے یہ تل کی اوٹ پہاڑ
حسرتیں بعد مرگ جائیں کہاں
دفن کر مجھ کو اور انہیں بھی گاڑ
وہ خدا جانے گھر میں ہیں کہ نہیں
کچھ کھلا اور کچھ ہے بند کواڑ
خاک میری بھی اس میں شامل ہے
اپنے دامن سے گرد راہ نہ جھاڑ
ناتواں دل اٹھائے کیا غم عشق
اک طرف رائی ایک سمت پہاڑ
میری تقدیر کا مرے دل کا
ان کے ہاتھوں میں ہے بناؤ بگاڑ
مال و زر دے دیا حسینوں کو
رہ گیا گھر میں صرف کاٹھ کباڑ
نوحؔ طوفان ہجر الفت میں
کوہ جودی کی ڈھونڈتے ہیں آڑ
چار دن وہ بناؤ رکھتے ہیں
اور رکھتے ہیں آٹھ روز بگاڑ
شعلۂ غم سے دل کا حال یہ ہے
جیسے پہلو میں جل رہا ہو بھاڑ
رخت ہستی کے ہو چکے ٹکڑے
اے جنوں اب مرے کفن کو پھاڑ
وہ نہیں تو مری نگاہ میں ہے
باغ ویران اور شہر اجاڑ
کاش اٹھ جائے پردۂ ہستی
میرے اور اس کے بیچ میں ہے یہ آڑ