مکمل شاعری
ذرا وصل پر ہو اشارہ تمہارا
ابھی فیصلہ ہے ہمارا تمہارا
بتو دین و دنیا میں کافی ہے مجھ کو
خدا کا بھروسہ سہارا تمہارا
محبت کے دعوے ملے خاک میں سب
وہ کہتے ہیں کیا ہے اجارہ تمہارا
نکل کر مرے گھر سے یہ جان لو تم
نہ ہوگا کسی گھر گزارہ تمہارا
رکاوٹ نہ ہوتی تو دل ایک ہوتا
تمہارا ہمارا ہمارا تمہارا
کریں گے سفارش ہم اے داغؔ ان سے
اگر ذکر آیا دوبارہ تمہارا
سنا ہے کسی اور کو چاہتا ہے
وہ دشمن ہمارا وہ پیارا تمہارا
— داغؔ دہلوی