مکمل شاعری

پیامی کامیاب آئے نہ آئے

خدا جانے جواب آئے نہ آئے

ترے غمزوں کو اپنے کام سے کام

کسی کے دل کو تاب آئے نہ آئے

اسے شرمائیں گے ذکر عدو پر

یہ قسمت ہے حجاب آئے نہ آئے

شمار اپنی خطاؤں کا بتا دوں

تمہیں شاید حساب آئے نہ آئے

تم آؤ جب سوار تو سن ناز

قیامت ہم رکاب آئے نہ آئے

یہ جا کر پوچھ آ تو ان سے درباں

کہ وہ خانہ خراب آئے نہ آئے

نئے خنجر سے مجھ کو ذبح کیجے

پھر ایسی آب و تاب آئے نہ آئے

شب وصل عدو تیری بلا سے

کسی مضطر کو خواب آئے نہ آئے

پیوں گا آج ساقی سیر ہو کر

میسر پھر شراب آئے نہ آئے

نہ دیکھو داغؔ کا دیوان دیکھو

سمجھ میں یہ کتاب آئے نہ آئے

— داغؔ دہلوی