مکمل شاعری

کچھ زہر نہ تھی شراب انگور

کیا چیز حرام ہو گئی ہے

جاتے جاتے پیام بر کو

ہر صبح سے شام ہو گئی ہے

اب دیکھیے مشق پائمالی

تعریف خرام ہو گئی ہے

پہنچے ہیں جب اس کی بزم میں ہم

مجلس ہی تمام ہو گئی ہے

آگے تو نہیں نہیں سنی تھی

اب تکیہ کلام ہو گئی ہے

عالم کو ہے دعوی محبت

یہ خاص بھی عام ہو گئی ہے

اس بت کے ہمیں نہیں ہیں بندے

مخلوق غلام ہو گئی ہے

برباد نہ ہوگی تیری الفت

تجویز مقام ہو گئی ہے

جاگیر جنوں کی قیس کے بعد

اب داغؔ کے نام ہو گئی ہے

— داغؔ دہلوی