مکمل شاعری
اس سے کیا خاک ہم نشیں بنتی
بات بگڑی ہوئی نہیں بنتی
میری صورت بنی تو خاک بنی
قسمت اے صورت آفریں بنتی
وہ بنی ابتدائے الفت میں
دم پہ جو وقت واپسیں بنتی
آدمی سب فرشتے بن جاتے
آسماں پر اگر زمیں بنتی
وعدے کرتے ہی کیا وہ آ جاتے
رات بھر زلف عنبریں بنتی
کاش سنتا نہ کوئی شور و فغاں
دل کی جا چشم سرمگیں بنتی
پارۂ جیب سے مرے اے کاش
دست وحشت کی آستیں بنتی
تو نے ایسے بگاڑ ڈالے ہیں
ایک کی ایک سے نہیں بنتی
نہ چمکتی جو حسن کی تقدیر
کیوں تری چاند سی جبیں بنتی
بزم دنیا تھی قابل جنت
خوب بنتی اگر یہیں بنتی
طبع نازک کا لطف جب تھا داغؔ
نازنینوں میں نازنیں بنتی
— داغؔ دہلوی