مکمل شاعری

قریب مے کدہ مجھ کو جو خانقاہ ملے

گلے ثواب کے کیا کیا مرے گناہ ملے

کہاں تھے رات کو ہم سے ذرا نگاہ ملے

تلاش میں ہو کہ جھوٹا کوئی گواہ ملے

مری خرابی میں آ کر وہ چوکڑی بھولے

کہ پھر نہ خانہ خرابی کو گھر کی راہ ملے

بھلا ہو پیر مغاں کا ادھر نگاہ ملے

فقیر ہیں کوئی چلو خدا کی راہ ملے

وہ روز حشر ہے دنیا نہیں کہ راہ ملے

کہاں چھپوگے جو دو چار داد خواہ ملے

تمہارے کوچے میں ہر روز وہ قیامت ہے

کہ سایہ ڈھونڈ رہا ہے کہیں پناہ ملے

ترا دل آئے کسی پر تو عرش ہل جائے

اثر تلاش میں ہے اس طرح کی آہ ملے

ترا غرور سمایا ہے اس قدر دل میں

نگاہ بھی نہ ملاؤں جو بادشاہ ملے

تمہارے حسن سے کیا رتبہ ماہ کنعاں کو

وہی تو چاند جسے ڈوبنے کو چاہ ملے

سر برہنہ مجنوں پہ آشیاں ہے تاج

نہ رکھے سر پہ جو فغفور کی کلاہ ملے

کروں میں عرض اگر جان کی اماں پاؤں

کہوں پتے کی اگر قہر سے پناہ ملے

سب اہل حشر جب اپنے کئے کو پائیں گے

بڑا مزا ہو جو مجھ کو مرا گناہ ملے

فلک کی طرح جفائیں نہ کیجیے ہر روز

اسی قدر ہے یہ نعمت جو گاہ گاہ ملے

یہ ہے مزے کی لڑائی یہ ہے مزے کا ملاپ

کہ تجھ سے آنکھ لڑی اور پھر نگاہ ملے

بلا سے دعوئ الفت نہ پیش کرتے ہم

ملے ہوئے ہیں جو دشمن سے وہ گواہ ملے

ہوا ہے درد جگر سے یہ گھر مرا تاریک

کہ موت ڈھونڈتی پھرتی ہے کوئی راہ ملے

نہ اس کو صبر نہ تاثیر کا پتا یا رب

جلا دیا ہے مجھے خاک میں یہ آہ ملے

اثر کہاں سے ملے جب یہ پھوٹ ہو باہم

الگ الگ رہے دونوں نہ حرف آہ ملے

نوید بخشش عصیاں اسے سنا دینا

جو شرمسار کہیں داغؔ رو سیاہ ملے

قمر کو جامہ شب تو بصر کو پردۂ چشم

کئی لباس ترے نور کو سیاہ ملے

مثل سنی ہے کہ ملنے سے کوئی ملتا ہے

ملو تو آنکھ ملے دل ملے نگاہ ملے

ٹھہر نہ آہ مری جان لے کے چلتے ہو

سفر کرے جو مسافر کو زاد راہ ملے

لگا کے پاؤں میں اس کے اڑاؤں قاصد کو

اگر مجھے ترے توسن کی گرد راہ ملے

اس انقلاب میں ڈھونڈو جو مشک اور کافور

تو یہ سفید ملے اور وہ سیاہ ملے

— داغؔ دہلوی