مکمل شاعری

ہیں بہت سے عاشق دلگیر جمع

تیرے ترکش میں ہیں کتنے تیر جمع

کوچۂ قاتل میں آفت آ گئی

جب ہوئے دو چار بھی رہ گیر جمع

یا لگا دو آگ یا لکھ دو جواب

ہو گیا ہے دفتر تحریر جمع

تھوڑی تھوڑی ہی ملے اس در کی خاک

چٹکی چٹکی ہم کریں اکسیر جمع

کس طرح یکجا ہوں داغؔ اپنے عزیز

ہونے دیتی ہی نہیں تقدیر جمع

اچھی صورت سے ہمیں بھی عشق ہے

کرتے ہیں تصویر پر تصویر جمع

خون دل کا چشم تر ٹھیکا نہ لے

اس سے ہونے کی نہیں توفیر جمع

— داغؔ دہلوی