مکمل شاعری
میرے ہی دم سے مہر و وفا کا نشاں ہے اب
تجھ سا اگر نہیں ہے تو مجھ سا کہاں ہے اب
جاتی ہے آدھی رات مگر اس کا کیا جواب
گھبرا کے وہ یہ کہتے ہیں وقت اذاں ہے اب
کیا لطف دوستی کہ نہیں لطف دشمنی
دشمن کو بھی جو دیکھیے پورا کہاں ہے اب
اس حال کو پہنچ گئیں دل کی خرابیاں
تیرا مکاں ہے اب نہ خدا کا مکاں ہے اب
سینے سے میرے دست تسلی اٹھائیے
یہ بھی دل نحیف کو بار گراں ہے اب
دیکھو ذرا سی شرم نے سب کچھ مٹا دیا
وہ آنکھ وہ نگاہ وہ چتون کہاں ہے اب
تم کو یقیں نہیں تو نہ ہو اس کا کیا علاج
کم بخت داغؔ تم سے بہت بد گماں ہے اب
— داغؔ دہلوی