مکمل شاعری

نفرت ہے حرف وصل سے اچھا یوہیں سہی

لو آؤ اور بات سنو وہ نہیں سہی

بے دل لگی بھی داغؔ گزرنی محال ہے

وہ دل نہیں سہی وہ تمنا نہیں سہی

سجدے ہی کرتے جائیں گے ہم تیری راہ میں

ہے نقش پا سے عار تو نقش جبیں سہی

چھوڑوں گا میں نہ ہاتھ چلے آؤ ساتھ ساتھ

نازک کلائی دکھتی ہے تو آستیں سہی

مشق جفا کے واسطے کس کی تلاش ہے

کوئی اگر نہیں ہے تو یہ کمتریں سہی

اقرار کر کے گھورتے ہو کیوں مری طرف

باور سہی یقین سہی دل نشیں سہی

بیداد کر کے چاہتے ہو پھر جفا کی داد

بہتر بجا درست صحیح آفریں سہی

— داغؔ دہلوی