مکمل شاعری
برسوں آنکھوں میں رہے آنکھوں سے پھر کر دل میں آئے
راہ سیدھی تھی مگر پہنچے بڑے چکر سے آپ
حضرت زاہد نکل آیا فلک پر آفتاب
پیر و مرشد اب تو اٹھیے میکدے کے در سے آپ
کٹ گئے لاکھوں گلے اس تیزیٔ رفتار سے
اب تو چل نکلے زیادہ اپنے بھی خنجر سے آپ
کیوں جناب داغؔ یاد اللہ میری یاد ہے
بھیس بدلے رات کو آتے تھے کس کے گھر سے آپ
اپنے سینہ سے دبا دیجے ذرا سینہ مرا
چور کیجے شیشۂ دل کو اسی پتھر سے آپ
— داغؔ دہلوی