مکمل شاعری

گو تری نظروں سے کل گر ہی پڑیں

آج تو کوئی سہارا چاہیئے

ہو سکے کیا اپنی وحشت کا علاج

تیرے کوچے میں بھی صحرا چاہیئے

کاش دے کر کچھ گرہ سے ہو نجات

تجھ کو زاہد دین و دنیا چاہیئے

ہر طرف ہے تیرے بیماروں کا شور

ہر گلی میں اک مسیحا چاہیئے

کیوں نہ چھائے مے کشوں کے سر پر ابر

کچھ گنہ گاروں کا پردہ چاہیئے

کیوں نہیں دیتے تسلی داغؔ کو

اس سے لیجے گر تمنا چاہیئے

قول تیرا شوق میرا چاہیئے

جھوٹ سچ کے واسطے کیا چاہیئے

— داغؔ دہلوی