مکمل شاعری

اے درد عشق خانۂ دل گھر ترا سہی

آباد یہ مکان تو جب ہو کہ تو نہ ہو

عاشق کے دل میں اور تری آرزو نہ ہو

اس باغ کا تو پھول ہو پھر اس میں بو نہ ہو

اس فکر میں کچھ ان سے نہ ہم بات کر سکے

یہ گفتگو نہ ہو کہیں وہ گفتگو نہ ہو

چاک دل رقیب کی جب فکر کیجیے

پہلے یہ دیکھ لیجیے پہلا رفو نہ ہو

مجھ کو جناب شیخ کی دعوت ضرور ہے

ایسی کہیں شراب ملے جس میں بو نہ ہو

مٹی کی مورت اس سے تو اے داغؔ خوب ہے

معشوق کیا جو شوخ نہ ہو خوش گلو نہ ہو

میں رنگ دیکھ کر نہ کروں گا یقیں کبھی

جب تک عدو کے خون کی خنجر میں بو نہ ہو

— داغؔ دہلوی