مکمل شاعری

ہو جو اس چشم مست سے بے خود

پھر اسے ہوشیار کون کرے

آپ کا اعتبار کون کرے

روز کا انتظار کون کرے

تم تو ہو جان اک زمانے کی

جان تم پر نثار کون کرے

آفت روزگار جب تم ہو

شکوۂ روزگار کون کرے

اپنی تسبیح رہنے دے زاہد

دانہ دانہ شمار کون کرے

ہجر میں زہر کھا کے مر جاؤں

موت کا انتظار کون کرے

وعدہ کرتے نہیں یہ کہتے ہیں

تجھ کو امیدوار کون کرے

داغؔ کی شکل دیکھ کر بولے

ایسی صورت کو پیار کون کرے

آنکھ ہے ترک زلف ہے صیاد

دیکھیں دل کا شکار کون کرے

ذکر مہر و وفا تو ہم کرتے

پر تمہیں شرمسار کون کرے

— داغؔ دہلوی