مکمل شاعری

غم حیات کو پھیلا دے آسمانوں تک

دل تباہ کو وسعت بھی کچھ زیادہ دے

حسین خواب نہ دے اب یقین سادہ دے

مرے وجود کو یا رب نیا لبادہ دے

مجھے قرار نہ دے تو پس غبار نفس

میں شہ سوار ہوں میدان بھی کشادہ دے

نہ چھین مجھ سے مرا ذوق خود نوردی بھی

مرے قدم کو بھی منزل نہ دے ارادہ دے

چمک دے چاند کو ٹھنڈک ہوا کو دل کو امنگ

اداس قصے کو پھر ایک شاہزادہ دے

مرے حریفوں کے دم خم میں ہو کمی تو انہیں

مرے غرور سے توفیق استفادہ دے

مرے رفیقوں کو دے حوصلہ کہ سنگ اٹھائیں

مرے خلوص کو ہر سنگ صد افادہ دے

اتار دے مری رگ رگ میں پھر سے سبز لہو

سکوت دشت کو پھر شورش اعادہ دے

کہ میری ذات بھی جس میں دھواں دھواں ہو جائے

کبھی کبھی مجھے وہ سجدہ بے ارادہ دے

— بشیر بدر