مکمل شاعری
خون پانی بنا کے پیتی ہے
دھوپ سرمایہ دار لگتی ہے
صبر کر صبر کرنے والوں کی
بے بسی شاندار لگتی ہے
رت جگوں کی بڑی حویلی اب
جنگلوں کا مزار لگتی ہے
اب بجھا دو ہماری آنکھیں بھی
روشنی ناگوار لگتی ہے
خاک جب خاکسار لگتی ہے
کس قدر با وقار لگتی ہے
آج کل میرے پاؤں کے نیچے
کوئی شے جان دار لگتی ہے
صرف اخبار پڑھنے والوں کو
زندگی اشتہار لگتی ہے
گرم موسم میں گرم چائے بھی
بد مزاجوں کا پیار لگتی ہے
— بشیر بدر