مکمل شاعری

میری آنکھوں میں غم کی نشانی نہیں

پتھروں کے پیالوں میں پانی نہیں

میں تجھے بھول کر بھی نہیں بھولتا

پیار سونا ہے سونے کا پانی نہیں

میری اپنی بھی مجبوریاں ہیں بہت

میں سمندر ہوں پینے کا پانی نہیں

کوئی آسیب ہے اس حسیں شہر پر

شام روشن ہے لیکن سہانی نہیں

شام کے بعد بچوں سے کیسے ملوں

اب مرے پاس کوئی کہانی نہیں

موسموں کے لفافے بدلتے رہے

کوئی تحریر اتنی پرانی نہیں

میرا چہرہ لکیروں میں تقسیم ہے

آئنوں سے مجھے بد گمانی نہیں

— بشیر بدر