مکمل شاعری
پھر دیے رکھ گئیں تیری پرچھائیاں
آج دروازہ دل کا کھلا دیکھ کر
تم جنہیں پھول سمجھے ہو آنکھیں نہ ہوں
پاؤں رکھنا زمیں پر ذرا دیکھ کر
تم ابھی شہر میں کیا نئے آئے ہو
رک گئے راہ میں حادثہ دیکھ کر
پھول سی انگلیاں کنگھیاں بن گئیں
الجھے بالوں سے ماتھا ڈھکا دیکھ کر
شام گہری ہوئی اور گھر دور ہے
پھول سو جائیں گے راستہ دیکھ کر
اس کی آنکھوں کا ساون برسنے لگا
بادلوں میں پرندہ گھرا دیکھ کر
— بشیر بدر