مکمل شاعری
یہ دشت غم کی تپش بیش از عذاب النار
نہ کوئی چھاؤں گھنی ہے نہ سایۂ دیوار
بہت ہیں شہر میں شاعر فسانہ گو فنکار
مگر کہاں ہے کوئی غم نصیب کا غم خوار
ز فرق تا بہ قدم ایک موجۂ مئے ناب
تکلمش کہ بجے جیسے چاندنی میں ستار
تمام رات میں خوابوں میں جاگتا ہی رہا
چڑھا ہوا ہے ان آنکھوں میں رات بھر کا خمار
بڑی خموشی سے دل چور چور ہوتا ہے
شکست شیشہ و ساغر نہیں جو ہو جھنکار
تمام دوستوں کا اعتبار چھین لیا
اس اجنبی نے نہیں جس سے کوئی قول و قرار
یہاں تو ساز کی موجوں میں بزم ڈوبی ہے
سنے گا کون بھلا اک غریب دل کی پکار
ازل کی تشنگیٔ دل کو کر گئی سیراب
یہ تیری نرم نگاہی کی نرم نرم پھوار
— بشیر بدر