مکمل شاعری
ہم نے الفاظ کو آئنہ کر دیا
چھپنے والے غزل میں چمک جائیں گے
رفتہ رفتہ ہر اک زخم بھر جائے گا
سب نشانات پھولوں سے ڈھک جائیں گے
یہ پرندے بھی کھیتوں کے مزدور ہیں
لوٹ کر اپنے گھر شام تک جائیں گے
دشمنی کا سفر اک قدم دو قدم
تم بھی تھک جاؤ گے ہم بھی تھک جائیں گے
دن میں پریوں کی کوئی کہانی نہ سن
جنگلوں میں مسافر بھٹک جائیں گے
گھر سے نکلے اگر ہم بہک جائیں گے
وہ گلابی کٹورے چھلک جائیں گے
نام پانی پہ لکھنے سے کیا فائدہ
لکھتے لکھتے ترے ہاتھ تھک جائیں گے
— بشیر بدر