مکمل شاعری

سویرے میری ان آنکھوں نے دیکھا

خدا چاروں طرف بکھرا ہوا ہے

ہماری شاخ کا نوخیز پتا

ہوا کے ہونٹ اکثر چومتا ہے

مجھے ان نیلی آنکھوں نے بتایا

تمہارا نام پانی پر لکھا ہے

اندھیری رات کا تنہا مسافر

مری پلکوں پہ اب سہما کھڑا ہے

سسکتے آب میں کس کی صدا ہے

کوئی دریا کی تہہ میں رو رہا ہے

حقیقت سرخ مچھلی جانتی ہے

سمندر کیسا بوڑھا دیوتا ہے

پکے گیہوں کی خوشبو چیختی ہے

بدن اپنا سنہرا ہو چکا ہے

سمیٹو اور سینے میں چھپا لو

یہ سناٹا بہت پھیلا ہوا ہے

— بشیر بدر