مکمل شاعری

وہ صورت گرد غم میں چھپ گئی ہو

بہت ممکن یہ وہ ہی آدمی ہو

بہت مصروف ہے انگشت نغمہ

مگر تم تو ابھی تک بانسری ہو

کہانی کہنے والے کہہ رہے ہیں

مگر جانے وہی جس پر پڑی ہو

وہ دریا میں نہانا چاندنی کا

کہ چاندی جیسے گھل کر بہہ رہی ہو

مری آنکھوں میں ریگستاں بسے ہیں

کوئی ایسے میں ساون کی جھڑی ہو

یہ شب جیسے کوئی بے ماں کی بچی

اکیلے روتے روتے سو گئی ہو

میں ٹھہرا آبشار شہر پر فن

گھنے جنگل کی تم بہتی ندی ہو

میاں! دیوان کا مت رعب ڈالو

پڑھو کوئی غزل جو واقعی ہو

غزل وہ مت سنانا ہم کو شاعر

جو بے حد سامعیں میں چل چکی ہو

دیا جو بجھ چکا ہے پھر جلانا

بہت محسوس جب میری کمی ہو

— بشیر بدر