مکمل شاعری

جس بادل کی آس میں جوڑے کھول لیے ہیں سہاگن نے

وہ پربت سے ٹکرا کر برس چکا صحراؤں میں

پہلا سا وہ زور نہیں ہے میرے دکھ کی صداؤں میں

شاید پانی نہیں رہا ہے اب پیاسے دریاؤں میں

پتہ تو آخر پتہ تھا گنجان گھنے درختوں نے

زمیں کو تنہا چھوڑ دیا ہے اتنی تیز ہواؤں میں

جانے کب تڑپے اور چمکے سونی رات کو پھر ڈس جائے

مجھ کو ایک روپہلی ناگن بیٹھی ملی ہے گھٹاؤں میں

دن بھر دھوپ کی طرح سے ہم چھائے رہتے ہیں دنیا پر

رات ہوئی تو سمٹ کے آ جاتے ہیں دل کی گپھاؤں میں

غزل کے مندر میں دیوانہ مورت رکھ کر چلا گیا

کون اسے پہلے پوجے گا بحث چلی دیوتاؤں میں

کھڑے ہوئے جو ساحل پر تو دل میں پلکیں بھیگ گئیں

شاید آنسو چھپے ہوئے ہوں صبح کی نرم ہواؤں میں

— بشیر بدر