مکمل شاعری

ہنسی معصوم سی بچوں کی کاپی میں عبارت سی

ہرن کی پیٹھ پر بیٹھے پرندے کی شرارت سی

اداسی پت جھڑوں کی شام اوڑھے راستہ تکتی

پہاڑی پر ہزاروں سال کی کوئی عمارت سی

سجائے بازوؤں پر بازو وہ میداں میں تنہا تھا

چمکتی تھی یہ بستی دھوپ میں تاراج و غارت سی

کھلا دے پھول میرے باغ میں پیغمبروں جیسا

رقم ہو جس کی پیشانی پہ اک آیت بشارت سی

میری آنکھوں میرے ہونٹوں پہ یہ کیسی تمازت ہے

کبوتر کے پروں کی ریشمی اجلی حرارت سی

وہ جیسے سردیوں میں گرم کپڑے دے فقیروں کو

لبوں پہ مسکراہٹ تھی مگر کیسی حقارت سی

— بشیر بدر