مکمل شاعری

بے تحاشا سی لاابالی ہنسی

چھن گئی ہم سے وہ جیالی ہنسی

مسکرائی خدا کی محویت

یا ہماری ہی بے خیالی ہنسی

لب کھلے جسم مسکرانے لگا

پھول کا کھلنا تھا کہ ڈالی ہنسی

وہ نہیں تھا وہاں تو کون تھا پھر

سبز پتوں میں کیسے لالی ہنسی

کون بے درد چھین لیتا ہے

میرے پھولوں کی بھولی بھالی ہنسی

دھوپ میں کھیت گنگنانے لگے

جب کوئی گاؤں کی جیالی ہنسی

میں کہیں جاؤں ہے تعاقب میں

اس کی وہ جان لینے والی ہنسی

ہنس پڑی شام کی اداس فضا

اس طرح چائے کی پیالی ہنسی

— بشیر بدر