مکمل شاعری

اسے تبرک حیات کہہ کے پلکوں پر رکھوں

اگر مجھے یقین ہو یہ راستے کی گرد ہے

مری نظر میں خاک تیرے آئنے پہ گرد ہے

یہ چاند کتنا زرد ہے یہ رات کتنی سرد ہے

وہ جن کے ذکر سے رگوں میں دوڑتی تھیں بجلیاں

انہیں کا ہاتھ ہم نے چھو کے دیکھا کتنا سرد ہے

حیات آج بھی کنیز ہے حضور جبر میں

جو زندگی کو جیت لے وہ زندگی کا مرد ہے

خدا کی نظموں کی کتاب ساری کائنات ہے

غزل کے شعر کی طرح ہر ایک فرد فرد ہے

کبھی کبھی تو یوں لگا کہ ہم سبھی مشین ہیں

تمام شہر میں نہ کوئی زن نہ کوئی مرد ہے

— بشیر بدر