مکمل شاعری

اک ذہن پریشاں میں خواب غزلستاں ہے

پتھر کی حفاظت میں شیشے کی جوانی ہے

پتھر کے جگر والو غم میں وہ روانی ہے

خود راہ بنا لے گا بہتا ہوا پانی ہے

دل سے جو چھٹے بادل تو آنکھ میں ساون ہے

ٹھہرا ہوا دریا ہے بہتا ہوا پانی ہے

ہم رنگ دل پر خوں ہر لالۂ صحرائی

گیسو کی طرح مضطر اب رات کی رانی ہے

جس سنگ پہ نظریں کیں خورشید حقیقت ہے

جس چاند سے منہ موڑا پتھر کی کہانی ہے

اے پیر خرد منداں دل کی بھی ضرورت ہے

یہ شہر غزالاں ہے یہ ملک جوانی ہے

دن تلخ حقائق کے صحراؤں کا سورج ہے

شب گیسوئے افسانہ یادوں کی کہانی ہے

اس حوصلۂ دل پر ہم نے بھی کفن پہنا

ہنس کر کوئی پوچھے گا کیا جان گنوانی ہے

غم وجہ فگار دل غم وجہ قرار دل

آنسو کبھی شیشہ ہے آنسو کبھی پانی ہے

وہ مصرعۂ آوارہ دیوانوں پہ بھاری ہے

جس میں ترے گیسو کی بے ربط کہانی ہے

وہ حسن جسے ہم نے رسوا کیا دنیا میں

نادیدہ حقیقت ہے نا گفتہ کہانی ہے

ہم خوشبوئے آوارہ ہم نور پریشاں ہیں

اے بدرؔ مقدر میں آشفتہ بیانی ہے

— بشیر بدر