مکمل شاعری

ایک ہی شہر میں رہتے بستے کالے کوسوں دور رہا

اس غم سے ہم اور بھی ہارے وہ بھی تو مجبور رہا

کال تھا اشکوں کا آنکھوں میں لیکن تیری یاد نہ پوچھ

کیا کیا موتی میں بھی فراہم کرنے پر مجبور رہا

وہ اور اتنا پریشاں خاطر ربط غیر کی بات نہیں

لیکن اس کے چپ رہنے سے دل کو وہم ضرور رہا

حسن کی شرط وفا جو ٹھہری تیشہ و سنگ گراں کی بات

ہم ہوں یا فرہاد ہو آخر عاشق تو مزدور رہا

عشق بھی مہر بہ لب گزرا ہے دنیا کی کیا جرأت تھی

اس کی نیچی نظروں میں بھی ایسا سخت غرور رہا

ہم ایسے ناکام وفا کے غول میں آکر بیٹھے ہو

دنیا کی تقدیر بدلنا جن کا اک دستور رہا

ہم سے اس کا ربط جنوں تھا ایک ہنسی کی بات سی تھی

ہم کو آخر کیوں یہ خبط سعیٔ نا مشکور رہا

اے میرے خورشید شبی کیا وہم طلوع و غروب تجھے

ایک تری گردش ایسی تھی خانۂ دل بے نور رہا

وقت کی بات ہے یاد آ جانا لیکن اس کی بات نہ پوچھ

یوں تو لاکھوں باتیں نکلیں تیرا ہی مذکور رہا

صبح سے چلتے چلتے آخر شام ہوئی آوارۂ دل

اب میں کس منزل میں پہنچا اب گھر کتنی دور رہا

— عزیز حامد مدنی