مکمل شاعری
جرأت شوق کے سوا خلوتیان خاص کو
اک ترے غم کی آگہی تا بہ سوال لے گئی
رات کی رات بوئے گل کوزۂ گل میں بس گئی
رنگ ہزار مے کدہ روح سفال لے گئی
تازہ ہوا بہار کی دل کا ملال لے گئی
پائے جنوں سے حلقۂ گردش حال لے گئی
تیز ہوا کی چاپ سے تیرہ بنوں میں لو اٹھی
روح تغیر جہاں آگ سے فال لے گئی
نافۂ آہوئے تتار زخم نمود کا شکار
دشت سے زندگی کی رو ایک مثال لے گئی
شعلۂ دل بجھا بجھا خاک زباں اڑی اڑی
دشت ہزار دام سے موج خیال لے گئی
ہجر و وصال و نیک و بد گردش صد ہزار و صد
تجھ کو کہاں کہاں مرے سرو کمال لے گئی
نرم ہوا پہ یوں کھلے کچھ ترے پیرہن کے راز
سب ترے جسم ناز کے راز وصال لے گئی
ماتم مرگ قیس کی کس سے بنے گی داستاں
نوحۂ بے زباں کوئی چشم غزال لے گئی
— عزیز حامد مدنی