مکمل شاعری
غور سے دیکھ کوئی ہے پس تصویر خزاں
ورنہ کس سمت گئے رنگ جمانے والے
بجھ گئے شوخ دریچوں میں دمکتے مہتاب
سو گئے رات کی تقدیر جگانے والے
فصل بے برگ کچھ ایسی بھی تو بے رنگ نہیں
داستاں عہد بہاراں کی سنانے والے
خم محراب پہ صدیوں کی سیہ گرد بھی دیکھ
طاق ویراں میں لہو اپنا جلانے والے
دف گل ٹوٹ گئی دست صبا میں لیکن
رقص کرتے ہی رہے وجد میں آنے والے
کس طرح کھوئے گئے عکس رواں کی صورت
شہر حیراں میں ترا کھوج لگانے والے
درس آداب جنوں یاد دلانے والے
آ گئے پھر مری زنجیر ہلانے والے
زہر اب زہر ہے کرتا نہیں کار تریاک
مر گئے زہر کو تریاک بنانے والے
سوچتا ہوں کہ یہ معمورۂ غم یہ دنیا
کس لیے تو نے بنائی ہے بنانے والے
— اسلم انصاری