مکمل شاعری
اتار لے کسی شیشے میں ساعت نغمہ
صدائے قافلۂ گل کہیں بکھر ہی نہ جائے
نگاہ یار، غم جاں گسل کا کیا ہوگا
ترے کرم سے نصیب وفا سنور ہی نہ جائے
ہے ایک قلزم خوں قریۂ جنوں سے ادھر
یہاں جو آئے کوئی اس کی پھر خبر ہی نہ جائے
کسی کو مہلت ہستی بھی دے غم جاناں
یہ کیا کہ آئے کوئی تو پلٹ کے گھر ہی نہ جائے
بہا دے آج کچھ آنسو کہ پھر غنیمت ہیں
چڑھا ہے آج جو دریا وہ کل اتر ہی نہ جائے
لرز لرز کے دل ناتواں ٹھہر ہی نہ جائے
فراق ساز کہیں روح نغمہ مر ہی نہ جائے
سنا بھی دے کسی گل کو فسون تنہائی
رہ خیال سے یہ کارواں گزر ہی نہ جائے
بجا کہ جاں سے گزرنا بہت کٹھن ہے مگر
ترے نثار کوئی ایسا کام کر ہی نہ جائے
وہ خوش مزاج ہے اس کو الم سے کیا نسبت
سنا نہ عشق کا غم، عشق سے وہ ڈر ہی نہ جائے
— اسلم انصاری