مکمل شاعری

اس وقت وہاں کون دھواں دیکھنے جائے

اخبار میں پڑھ لیں گے کہاں آگ لگی تھی

پلکوں کے ستارے بھی اڑا لے گئی انورؔ

وہ درد کی آندھی کہ سر شام چلی تھی

چپ سادھ کے بیٹھے تھے سبھی لوگ وہاں پر

پردے پہ جو تصویر تھی کچھ بول رہی تھی

لہراتے ہوئے آئے تھے وہ امن کا پرچم

پرچم کو اٹھائے ہوئے نیزے کی انی تھی

ڈوبے ہوئے تاروں پہ میں کیا اشک بہاتا

چڑھتے ہوئے سورج سے مری آنکھ لڑی تھی

پڑھنے بھی نہ پائے تھے کہ وہ مٹ بھی گئی تھی

بجلی نے گھٹاؤں پہ جو تحریر لکھی تھی

شبنم کی تراوش سے بھی دکھتا تھا دل زار

گھنگھور گھٹاؤں کو برسنے کی پڑی تھی

— انور مسعود