مکمل شاعری

در کائنات جو وا کرے اسی آگہی کی تلاش ہے

مجھے روشنی کی تلاش تھی مجھے روشنی کی تلاش ہے

یہ جو آگ سی ہے دبی دبی نہیں دوستو مرے کام کی

وہ جو ایک آن میں پھونک دے اسی شعلگی کی تلاش ہے

غم زندگی کے فشار میں تری آرزو کے غبار میں

اسی بے حسی کے حصار میں مجھے زندگی کی تلاش ہے

یہ جو سرسری سی نشاط ہے یہ تو چند لمحوں کی بات ہے

مری روح تک جو اتر سکے مجھے اس خوشی کی تلاش ہے

یہ جو ساختہ سے ہیں قہقہے مرے دل کو لگتے ہیں بوجھ سے

وہ جو اپنے آپ میں مست ہوں مجھے اس ہنسی کی تلاش ہے

یہ جو میل جول کی بات ہے یہ جو مجلسی سی حیات ہے

مجھے اس سے کوئی غرض نہیں مجھے دوستی کی تلاش ہے

— امجد اسلام امجد