مکمل شاعری

یہ اور بات ہے تجھ سے گلا نہیں کرتے

جو زخم تو نے دیے ہیں بھرا نہیں کرتے

جہاں ہو پیار غلط فہمیاں بھی ہوتی ہیں

سو بات بات پہ یوں دل برا نہیں کرتے

ہر اک دعا کے مقدر میں کب حضوری ہے

تمام غنچے تو امجدؔ کھلا نہیں کرتے

ہمیں ہماری انائیں تباہ کر دیں گی

مکالمے کا اگر سلسلہ نہیں کرتے

یہ آئنوں کی طرح دیکھ بھال چاہتے ہیں

کہ دل بھی ٹوٹیں تو پھر سے جڑا نہیں کرتے

ہزار جال لیے گھومتی پھرے دنیا

ترے اسیر کسی کے ہوا نہیں کرتے

وفا کی آنچ سخن کا تپاک دو ان کو

دلوں کے چاک رفو سے سلا نہیں کرتے

جو ہم پہ گزری ہے جاناں وہ تم پہ بھی گزرے

جو دل بھی چاہے تو ایسی دعا نہیں کرتے

— امجد اسلام امجد