مکمل شاعری

جو بگولا دشت غربت میں اٹھا سمجھا یہ میں

کرتی ہے تعمیر دیوانی مرے گھر کا جواب

ہے خموشی ظلم چرخ دیو پیکر کا جواب

آدمی ہوتا تو ہم دیتے برابر کا جواب

ساتھ خنجر کے چلے گی وقت ذبح اپنی زبان

جان دینے والے دیتے ہیں برابر کا جواب

ابر کے ٹکڑے نہ الجھیں میری موج اشک سے

خشک مغزوں سے ہے مشکل مصرعۂ تر کا جواب

سجدہ کرتا ہوں جو میں ٹھوکر لگاتا ہے وہ بت

پاؤں اس کا بڑھ کے دیتا ہے مرے سر کا جواب

وہ کھنچا تھا میں بھی کھنچ رہتا تو بنتی کس طرح

سر جھکا دیتا تھا قاتل تیرے خنجر کا جواب

شیخ کہتا ہے برہمن کو برہمن اس کو سخت

کعبہ و بت خانہ میں پتھر ہے پتھر کا جواب

ہر جگہ قبر گدا تکیے میں ہر جا گور شاہ

ایک گھر اس شہر میں ہے دوسرے گھر کا جواب

جیتے جی ممکن نہیں اس شوخ کا خط دیکھنا

بعد میرے آئے گا میرے مقدر کا جواب

جلوہ گر ہے نور حق ہونے سے یکتائی امیرؔ

سایہ بھی ہوتا اگر ہوتا پیمبر کا جواب

روز دکھلاتا ہے گردوں کیسی کیسی صورتیں

بت تراشی میں ہے یہ کافر بھی آذر کا جواب

— امیر مینائی