مکمل شاعری

ہزاروں لوٹ گئے کل اٹھی جو وہ چلمن

خدنگ موئے مژہ برچھیاں نگاہیں تھیں

فلک کے دور سے دنیا بدل گئی ورنہ

جہاں بنے ہیں یہ مے خانے خانقاہیں تھیں

نکل کے چہرے پہ میدان صاف خط نے کیا

کبھی یہ شہر تھا ایسا کہ بند راہیں تھیں

فراق میں ترے عاشق کو جا کے کل دیکھا

کہ وہ تو ہیچ تھا کچھ اشک تھے کچھ آہیں تھیں

حسین زر کے ہیں طالب کہ اب ہیں گرد امیرؔ

غریب ہم تھے تو یہ پیار تھا نہ چاہیں تھیں

جگر میں ہجر کی کل چبھ رہی تھیں کچھ پھانسیں

مگر جو غور سے دیکھا تری نگاہیں تھیں

کیا یہ شوق نے اندھا مجھے نہ سوجھا کچھ

وگرنہ ربط کی اس سے ہزار راہیں تھیں

یہ ضعف ہے کہ نکلتی نہیں ہیں اب دل سے

کبھی فلک سے بھی اونچی ہماری آہیں تھیں

مشاعرے سے حسیں کیوں نہ چھین لے جاتے

رباعیاں مری چوگوشیہ کلاہیں تھیں

گلے میں ہاتھ تھے شب اس پری سے راہیں تھیں

سحر ہوئی تو وہ آنکھیں نہ وہ نگاہیں تھیں

یہ ضعف اب ہے کہ ہلنا گراں ہے قدموں کو

سبک روی میں کبھی ان کو دستگاہیں تھیں

بگولے اب ہیں کہ غربت ہے گور شاہاں پر

سروں پہ چتر جلو میں کبھی سپاہیں تھیں

پہنچ گئے سر منزل چلے جو چال نئی

انہیں میں پھیر تھا دیکھی ہوئی جو راہیں تھیں

— امیر مینائی