مکمل شاعری

مجھ مست کو مے کی بو بہت ہے

دیوانے کو ایک ہو بہت ہے

جاتے ہیں جو صبر و ہوش جائیں

مجھ کو اے درد تو بہت ہے

موتی کی طرح جو ہو خداداد

تھوڑی سی بھی آبرو بہت ہے

مانند کلیم بڑھ نہ اے دل

یہ درد کی گفتگو بہت ہے

اے نشتر غم ہو لاکھ تن خشک

تیرے دم کو لہو بہت ہے

کیا وصل کی شب میں مشکلیں ہیں

فرصت کم آرزو بہت ہے

بے کیف ہو مے تو خم کے خم کیا

اچھی ہو تو اک سبو بہت ہے

چھیڑے وہ مژہ تو کیوں میں روؤں

آنکھوں میں خلش کو مو بہت ہے

غنچے کی طرح چمن میں ساقی

اپنا ہی مجھے سبو بہت ہے

کیا غم ہے امیرؔ اگر نہیں مال

اس وقت میں آبرو بہت ہے

منظور ہے خون دل جو اے یاس

اپنے لیے آرزو بہت ہے

— امیر مینائی