مکمل شاعری

چشم نرگس کہاں وہ چشم کہاں

نشہ کیسا خمار سا ہے کچھ

دل جو سینے میں زار سا ہے کچھ

غم سے بے اختیار سا ہے کچھ

رخت ہستی بدن پہ ٹھیک نہیں

جامۂ مستعار سا ہے کچھ

کل تو آفت تھی دل کی بیتابی

آج بھی بے قرار سا ہے کچھ

مردہ ہے دل تو گور ہے سینہ

داغ شمع مزار سا ہے کچھ

نخل امید میں نہ پھول نہ پھل

شجر بے بہار سا ہے کچھ

اس کو دنیا کی اس کو خلد کی حرص

رند ہے کچھ نہ پارسا ہے کچھ

پہلے اس سے تھا ہوشیار امیرؔ

اب تو بے اختیار سا ہے کچھ

ساقیا ہجر میں یہ ابر نہیں

آسماں پر غبار سا ہے کچھ

— امیر مینائی